Вось ужо 8 раз у сценах гімназіі імя Я. Купалы праводзілася важнае і значнае культурна-асветніцкае мерапрыемства “Купалаўскія чытанні”, прысвечанае Міжнароднаму дню роднай мовы. Конкурс накіраваны на выхаванне ў падрастаючага пакалення нацыянальнай свядомасці, патрыятызму, далучэнне вучняў да даследчай дзейнасці, павышэнне іх цікавасці да беларускай мовы, культурнай спадчыны свайго народа, гісторыі культуры роднай краіны, развіццё інтэлектуальнай і мастацкай творчасці. Традыцыйнай стала секцыя “Культурная спадчына”, на якой выступаюць навучэнцы з вучэбна-даследчымі работамі па беларускай літаратуры, краязнаўстве, этнаграфіі, гісторыі Беларусі. Асаблівай папулярнасцю ў вучняў і іх настаўнікаў карыстаюцца секцыі “Святыня народа” - конкурс чытальнікаў вершаў ці празаічных урыўкаў з твораў беларускіх пісьменнікаў-юбіляраў і “Мой творчы радак”, конкурс вучнёўскіх апавяданняў, эсэ, вершаў. Тэматыка творчых работ кожны год мяняецца. Секцыя малюнкаў была на тэму “Палессе ў творах беларускіх пісьменнікаў” для вучняў IV-XI класаў, секцыя “Інтэлектуальная” па тэме “Маё Палессе”, секцыя “Буктрэйлер” на тэму “Маё бачанне твораў пісьменнікаў-юбіляраў 2019 года”, конкурс інсцэніровак беларускіх народных і літаратурных казак ці ўрыўкаў з іх для вучняў 4-х класаў “Раскажыце казку, калі ласка”.

Расце колькасць удзельнікаў чытанняў, роўна як і іх геаграфія. Сёлета ў мерапрыемстве на розных этапах і ў секцыях прынялі ўдзел 389 навучэнцаў з 10 раёнаў Гомельскай вобласці: Мазырскага, Калінкавіцкага, Лельчыцкага, Ельскага, Петрыкаўскага, Жыткавіцкага, Нараўлянскага, Рагачоўскага, Жлобінскага, Гомельскага, 154 навучэнца ўзнагароджаны дыпломамі. Конкурс “Купалаўскія чытанні” праводзіцца заўсёды вельмі ярка, маляўніча, з запрашэннем ганаровых гасцей: навукоўцаў, паэтаў, выкладчыкаў МДПУ імя І.Шамякіна. Выпускаюцца зборнікі вершаў пераможцаў секцыі “Мой творчы радак”.